Sitje ute eller inne?
Eg likar best å ete ute. Det må ikkje regne, men elles er det berre å ta på ei varm jakke. Denne våren har det vore regn mesta kvar dag, og sommaren teiknar til å bli like eins.
I dag regna det, men så letta det, og eg var snar til å finne fram kost og målarspann for å måle bislaget på Gamlehuset. Det var tidvis sterk sol så eg tenkte at det kanskje var litt feil å måla. Eg vart ferdig med målarjobben og sette i gang med å koke risengrynsgraut. Såg fram til å sitje på terassen og nyte graut. Brått såg eg at det ausa ned med regn og vind. Det rann nedetter dei nymåla veggene.
Då vi vel hadde fått i oss grauten og gjort unna ei middagskvild, skein sola. Det vart inga matstund ute denne dagen.
Det dukkar opp eit minne frå då eg var barn. Heile familien med foreldre og fire born var på slåtteteigen og det var tid for mat. Mor hadde ordna med niste. Det var ein dag med regn, men vi sat godt inn til hesa vi heldt på med, kjende lukta av det rå graset. Men best hugsar eg smaken av kakeskiva. Trur aldri eg har smakt ei så god brødskive.