No livnar det i lundar…
I går var det marimesse, men våren lèt vente på seg. Likevel spelte Austefjord hornmusikk «No livnar det i lundar» på festen om kvelden. Det var få som song attåt, men eg kjende at det var eit sterkt sug i heile salen: No lyt våren kome! Vi får rope på han: «Du vår med ljose dagar med lengting liv og song….!
Elias Blix kunne få sagt det. Må tenkje på den gongen vi gjesta fødestaden hans på Sandhornøya. På den høgreiste bautasteinen står den første strofa i fedrelandssalmen: «Gud signe vårt dyre fedreland» . I bakgrunnen kneisar fjellet han syng om i «Å, eg veit meg eit land». I det andre verset heiter det:
«Der eit fjell stig mot sky
med si kruna i snø,
og i lauvklednad ny
det seg speglar i sjø…»
Denne kvelden var det ikkje snø i fjellkruna. I Gildeskål kjem våren endå seinare enn her på Sunnmøre, men han kjem gjerne i ekspressfart der nord.
