Follabloggen

Så vart det Fløyentur likevel, men hjelpe meg for ei ishelle som møtte oss då vi vel hadde passert Skansemyren. Vel, vi kom oss opp vi tre karane og vesle Johanna i vogna. Det hadde vorte litt skumt, men utsikta frå Fløyen er alltid verd ein tur berre det ikkje er skodde. Harald svigerson tok eit bilete som no vert ei fornying av profilen min på facebook. Etterpå var det besøk på sushirestaurant, men det vart berre ein smak når det gjaldt den typiske japanske matretten. Håvard svermar for sushi så eg måtte plent smake på det han hadde bestilt, og godt var det. I morgon ber det nordover att. Eg har ein mistanke om at komande veke vert ganske travel. Får besøk av røyrleggar og elektrikar midt opp i at det kjem tre karar med arbeidslyst som vil gå laus på granene i Haslelida. Kvifor er overskrifta Vy 2? Jau, gårdagens var det utsikta frå stova i 5. adr. Krybbesmauet 1. Denne utsikta må vere verd fleire hundre tusen kroner. I dag var det Fløyen. Hit kan ein også kome med Fløybana som har hovudstasjon rett nede i bakken. Når eg kjem heim er det  utsikt mot gardar langt unna, og fjellsider!