«Skrik»
I natt skal «Skrik»på auksjon i New York. Han som måla skilderiet har skrike frå seg for mange år sidan. No er det visst fire variantar av måleriet, men det er eitt som har vore i privat eige som skal under hammaren. Det vert spennande å lese i morgon eller høyre på nyheitene kva som vart prisen. Det har vorte tippa at det kan kome til å koste tusen millionar kroner! Det er vel ikkje noko galleri som har nok pengar til det. Kanskje er det er ein nyrik russar som dreg av med biletet, eller ein kinesar, eller kanskje Romney.
Viss eg hadde måla dette enkle motivet, ville det aldri kome opp i hundre kroner. Det geniale er gjerne enkelt, men eg hadde aldri slege igjennom med å måle noko slikt. Ein må vere Munch for å skape «Skrik», «Madonna» eller «Syk pike».
«Skrik» er eit unikt bilete og det som er verkeleg originalt, kan vanskeleg verdsetjast høgt nok. «Skrik» er ikkje berre ein illustrasjon av eit menneske som skrik ut si fortviling, heile biletet er eit skrik. Linene i landskapet og fargane er også med på å få fram dette.
