Ei travel tid
Hausten er ei travel tid sjølv om ein er pensjonist. Gjeremåla står i kø, regnelingane også.
Første hjorteslaktet er stelt. Heile sist laurdag gjekk med til å skjere opp den halve hjorten eg henta oppi Skaret. Det var visst ein frampart av kolle og ein bakpart av bukk(!) Sidan vi fekk i minste laget i fjor, skal vi nok ha noko meir å stelle til i år.
Elles var det den veggen på Gamlehuset eg var i ferd med å skifte ut nokre fjøler på, men så er dei så breie at slike ikkje er å få på byggsenteret. Eg har ein avtale med ein som har liggande ein stabel, men mannen må bli frisk av ei stygg forkjøling først.
Viktigaste prosjektet er torvtekking av vedahuset. Førebuing til dette har eg jobba med i dag. Kona dreiv og laga kjøtkaker av hjortedeiga, men kom eins erend ut og skrytte av mannen sin som hadde fått torvålane på plass.
Grannen med gravemaskin har lova å flekkje av torver til taket, så planane er klare vidare. Det ville no vere bra om eg vart ferdig til snøen eller frosten kjem.
Det er visst endå meir som ventar på ein innsats i dagane som kjem.
