Kulde

Det er vinter. Idag tidleg viste gradestokken -7. Kaldare skal det visst bli. Kaldaste på 1000 år. Eg fyrer kvar dag og reknar med å ha nok ved til vårs. Her er inga varmepumpe i huset, og det er vel heller ikkje noka hjelp i viss temperaturen ligg rundt  – 20. Det vert vel rift om turane til Kanariøyane og andre stader med mildare verlag. Eg har ikkje slike planar. Skal det vere nokon vits i, må ein vere der i 3 månader, minst! Kan det vere prognosane om kald vinter som får kronprinsen med familie til å reise frå landet i to månader? Det er best å halde seg ved teltet og legge i ovnen.  Får heller ikkje ferdig badet i kjellaren viss eg skal ligge og dra meg på ei strand i sør ein stad.

Annonser

Ingen blåmåndag 08.11.2010

Somme dagar viser det meir att av (ein )enn elles. Vart gjort meir i dag enn eg trudde i dag tidleg. Kom i gang med plating av veggene på badet i kjellaren. Gipsplater er tunge å handtere og manøvrere.  Slik som det støvar når ein skal sage!
Vart så ivrig i dag at eg ikkje hadde ferdig middag til ho som framleis kjempar i arbeidslivet. Steikt sei fiska sist sommar.
Ein bra måndag, altså.

Annonser

Krype før ein kan gå

Slik er det. Når ein skal lære noko, må ein ta det stegvis. Dette bør ein person med lang pedagogisk røynsle vite.  Tek ein snarvegar, kan ein kome til å angre. Skal ein søkje råd, må ein framfor alt stille rette spørsmål. Det kan vere krevjande nok.

Vi er nok ein gong komne til laurdag. Bra dag det, men det er ein dag då eg ofte får gjort svært lite. Sein start, avislesing, graut til middag, tidleg kveld og så altfor mykje fjernsyn. Gå ut, seier du, restaurantbesøk, konsert, overraskande besøk hos einkvan. Nei, oftast vert det heimekos. Hadde besøk ei veke av dotter og to barnebarn, dei reiste med flyet frå Hovden i går. No er det Bjørg og eg. Ute snør det.

Annonser